Barnamenningarhátíð í Kópavogi var sett í dag, þriðjudaginn 18.apríl, kl. 10 á Bókasafni Kópavogs en þá opnaði falleg sýning í fjölnotasal á 1. hæð með litríkum teikningum 120 leikskólabarna úr sex leikskólum í Kópavogi. Margrét Eir söngkona og Davíð Sigurgeirsson gítarleikari tóku á móti börnunum og öðrum gestum opnunarinnar með ljúfum tónum. Alls 120 leikskólabörn, þ.á.m. listamenn sýningarinnar, mættu á opnunina og tóku vel undir í samsöngnum en börnin komu frá leikskólunum Arnarsmári, Álfaheiði, Fagrabrekka, Marbakki, Núpur og Skólatröð (Urðarhóll). Ásdís Kristjánsdóttir bæjarstjóri og einn fulltrúi frá hverjum leikskóla klipptu svo á borða til að opna formlega sýninguna og Barnamenningarhátíð í Kópavogi við mikinn fögnuð gesta.
