Ljóðstafur Jóns úr Vör
Upphaf Daga ljóðsins í ár markast af afhendingu Ljóðstafs Jóns úr Vör, sem veittur er 21. janúar ár hvert en við sama tilefni verða veitt verðlaun og viðurkenningar í ljóðasamkeppni grunnskólanna. Ljóðstafur Jóns úr Vör hefur verið haldinn árlega frá 2002 og fagnar því 22 ára afmæli sínu í ár en hátíðin fer ávallt fram á afmælisdegi skáldsins Jóns úr Vör og í hans minningu. Á meðal skálda sem hlotið hafa Ljóðstafinn í gegnum tíðina eru Gerður Kristný, Linda Vilhjálmsdóttir, Óskar Árni Óskarsson, Anton Helgi Jónsson og Þórdís Helgadóttir. Athöfnin fer fram í Salnum, sunnudaginn 21. janúar kl. 16. Þar verður boðið upp á ljóðalestur, lifandi tónlist og léttar veitingar.
Glæný ljóð og eldgömul
Glæný ljóð verða í brennidepli á Bókasafni Kópavogs, miðvikudaginn 24.janúar kl. 17 þegar skáldin Draumey Aradóttir, Guðmundur S. Brynjólfsson, Harpa Rún Kristjánsdóttir og Melkorka Ólafsdóttir lesa upp úr nýútkomnum ljóðabókum sínum sem hverfast um margvísleg viðfangsefni. Boðið verður upp á léttar veitingar.
Í Salnum í Kópavogi verður sjónum beint að ljóðlist að fornu og nýju á ljóðamálþingi sem Óðfræðifélagið Boðn efnir til til í Salnum, Kópavogi, laugardaginn 27.janúar frá 12 – 15 en þangað er allt áhugafólk um ljóð og óðfræði boðið velkomið.
Nærandi söngstund fyrir fjölskylduna
Þau Ragnheiður Gröndal söngkona og Guðmundur Pétursson gítarleikari bjóða upp á notalega söngstund fyrir alla fjölskylduna á Bókasafni Kópavogs, laugardaginn 27. janúar frá 13 – 14. Þar gefst börnum og fjölskyldum einstakt tækifæri til að upplifa íslenska texta í gegnum tónlist, söng og sögur úr ólíkum áttum.
Treystu náttmyrkrinu og ljóðajazz
Ljóðið verður líka í öndvegi á hádegistónleikum kvartettsins Stirnis þar sem hljómar tónlist við ljóð Sigurð Pálsson, Einar Braga og fleiri en tónlistin er eftir Kolbein Bjarnason, Egil Gunnarsson og Hafdísi Bjarnadóttur. Tónleikarnir eru liður í tónlistarhátíðinni Myrkir músíkdagar en kvartettinn Stirni skipa Björk Níelsdóttir, sópran, Grímur Helgason, klarinett, Hafdís Vigfúsdóttir, flauta og Svanur Vilbergsson, gítar.
Fimmtudaginn 25. janúar kl. 12:15 munu söngkonurnar María Bóel og Ragnheiður Silja ásamt Guðmundi Grétari meðleikara flytja fjölbreytt úrval íslenskra laga en tónleikarnir eru haldnir í samstarfi við framhaldsbraut FÍH.
Ljóðaandrými í amstri dagsins
Á meðan Dagar ljóðsins standa yfir verður boðið upp á ljóðaandrými í Beckmannsstofu á Bókasafni Kópavogs. Þar verður hægt að setjast niður í amstri dagsins, slaka á og njóta þess að hlusta á upptökur af ljóðaupplestri nokkurra skálda í notalegu umhverfi en skáldin eru Ragnheiður Lárusdóttir, Ólafur Sveinn Jóhannesson, Hildur Kristín Thorstensen, Gunnhildur Þórðardóttir, Eyrún Ósk Jónsdóttir, Eygló Jónsdóttir og Anton Helgi Jónsson.
Á Bókasafni Kópavogs verður jafnframt hægt að skoða ljóð sem bárust í ljóðasamkeppni grunnskóla Kópavogs en sýning með þeim ljóðum verður sett upp á jarðhæð safnsins.
Það er lista- og menningarráð Kópavogs sem styrkir Daga ljóðsins. Ókeypis er á alla viðburði og öll hjartanlega velkomin.
