Þriðja útfærsla Lúppu er samtal tveggja vídeóverka sem fjalla á sinn hátt um samspil náttúru og markaðssetningar, umbreytingu, ferðamennsku og þránna til að upplifa eitthvað stórkostlegt.
Verkið Getur þú hugsað í sviðsmyndum? (2022) eftir Kristínu Karólínu Helgadóttur var unnið í námunda við Vatnajökul í lok heimsfaraldurs þar sem draumum, auglýsingum, hamfarahlýnun, samfélagsmiðlum og túrisma ægir saman. Kristín var nýflutt úr hringiðu meginlands Evrópu í dreifbýl Öræfin. Flutningurinn varð kveikja að verkinu sem er leikur að ólíkum sviðsmyndum, spá um hið óorðna, mögulega heimsendi. Verkið var upprunalega unnið fyrir sýninguna Rúllandi snjóbolti í Ars Longa safninu á Djúpavogi.
Kristín Karólína (f. 1988) notar ýmsa miðla í vinnu sinni til þess að kasta ljósi á þá innri togstreitu og dulinn tvískinnung á milli vestrænna lífshátta og náttúrunnar sem maðurinn byggir. Hún skapar draumkenndar myndhverfingar sem fléttast saman við leik með hið hversdagslega og mynda óvæntar tengingar eða jafnvel opinberanir. Í verkum hennar má skynja möguleika á að fortíðin sé samofin nútíðinni og að hlutirnir í kringum okkur búi ætíð yfir mörgum lögum hið innra.
Eitt sinn var sólmyrkvin túlkaður sem ógnvænleg truflun á takti náttúrunnar. Nú er hann útreiknanlegur viðburður og vinsælt sjónarspil með sölu á meðfylgjandi varningi og minjagripum. Eclipse Chasers (2017 – 2024 -) eftir Consider to be Allies kannar sameinginarkraft náttúrunnar í samtíma sem einkennist af skautun og aukinni þörf á tengingu við umheiminn, hvernig hið manngerða hefur áhrif á samband fólks við náttúru. Hljóð og ljós úr borgarumhverfinu blæða inn í náttúru-upplifunina og vísanir í dægurmenningu til þess að deila upplifunum.
Margaux Parillaud (FR) og Mie Frederikke Fischer Christensen (DK) vinna saman undir nafninu Consider to be Allies. Þær vinna þvert á miðla, bæði tíma tengt í vídeó og gjörninga sem og grafík verk og innsetningar. Þær hafa áhuga á miðlun og kanna hvernig skynjun á raunveruleikanum og skoðana myndun er mótuð af sameiginlegum upplifunum og fjölmiðlum. Lúppa er sýningaröð þar sem tveimur vídeóverkum er stillt saman og þau spiluð í hringrás. Á nokkra vikna fresti breytist takturinn og ný verk taka við. Þriðja útfærsla Lúppu mun spilast 17.06 – 24.08.2026.
