Fjörutíu skynfæri, útskriftarsýning nemenda í hönnun og arkitektúr við Listaháskóla Íslands, er opin í Gerðarsafni frá sunnudeginum 30. ágúst 2020.
Á sýningunni má sjá verk eftir nemendur sem útskrifuðust úr hönnun og arkitektúr frá Listaháskóla Íslands í júní 2020. Verkin eru lokapunkturinn á þriggja ára lærdómsferli nemenda og miðla persónulegri sýn þeirra á viðfangsefni sem snerta bæði samfélagslegan veruleika, tilfinningalíf, umhverfi og vissu og óvissu um framtíðina. Verkefnin bera hvert á sinn hátt vott um skapandi og frjóa nálgun í hönnun og arkitektúr. Öll byggja þau á samstarfi og samvinnu, þekkingarleit, tilfinningum og klókindum þar sem við sögu koma í það minnsta fjörutíu skynfæri og skynjanir, s.s. hungur, þorsti, jafnvægi, kláði, kvíði, snerting, hjartsláttur, skjálfti, hreyfing, hljóð og hiti. Sýningastjórar eru Anna María Bogadóttir, Atli Bollason, Linda Björg Árnadóttir og Ólöf Rut Stefánsdótttir.
Aðgangur að Gerðarsafni er ókeypis á meðan á sýningunni stendur.
