Hádegisleiðsögn um verk Barböru Árnason í Gerðarsafni og sýninguna Áhrifavaldar æskunnar – íslenskar barnabækur fyrr og nú á Bókasafni Kópavogs. Sýningarnar eru liður í viðburðaröðinni Barnabókin í 100 ár sem verður á aðalsafni Bókasafns Kópavogs í febrúar.
Leiðsögnin hefst á neðri hæð Gerðarsafns þar sem skoðaðar verða teikningar, tréristur og koparstungur Barböru. Valdar barnabækur með bókaskreytingum hennar eru einnig til sýnis við þetta tækifæri. Seinni hluti leiðsagnarinnar fer fram á aðalsafni Bókasafns Kópavogs þar sem sýningin Áhrifavaldar æskunnar – íslenskar barnabækur fyrr og nú stendur nú yfir. Á sýningunni má sjá bækur frá ólíkum tímum þar sem gestir geta rifjað upp gamlar minningar og séð hvað aðrar kynslóðir hafa lesið sér til yndis. Sýningarstjóri er Guðfinna Mjöll Magnúsdóttir hönnuður.
Menning á miðvikudögum er á dagskrá í hádeginu í hverri viku og fer ýmist fram í Gerðarsafni, Salnum, Náttúrufræðistofu og Bókasafni Kópavogs.
