Rithöfundurinn og listakonan Ása Hlín Benediktsdóttir heldur listasmiðju fyrir börn á öllum aldri sem byggð er á bók hennar Hallormsstaðaskógur: söguljóð fyrir börn.
Bókin er innblásin af náttúrunni í Hallormsstaðaskógi en Ása Hlín handmálaði sjálf allar myndirnar í bókinni með heimagerðu bleki, úr jurtum og steinefnum úr skóginum. Tónlistarmaðurinn Charles Ross samdi síðan tónlist sem einnig var innblásin af skóginum. Við upptökur af tónlistinni nýtti hann upptökur náttúruhljóða úr Hallormsstaðaskógi í bland við hljóðfæraleik.
Ása Hlín mun lesa úr bókinni fyrir krakkana, leyfa þeim að hlýða á tónlistina og bjóða þeim svo að búa til sína eigin náttúrulist, klippimyndir úr þurrkuðum blómum. Börnin eru hvött til að tína sín eigin blóm, þurrka þau og koma með í smiðjuna, en einnig verða þurrkuð blóm á staðnum fyrir þá sem vilja það heldur.
Bókin fjallar um Hallormsstaðaskóg og Lagarfljótsorminn og sækir til norrænnar goðafræði og íslendingasagna en þar koma við sögu Níðhöggur, Fáfnir og fleiri ormar/drekar úr fornsögunum.
Dásamleg náttúru og listastund fyrir fjölskyldur á Jónsmessunni. Öll velkomin.
