Opnun | Líkamleiki

Sýningin Líkamleiki er hluti af Ljósmyndahátíð Íslands. Á sýningunni eru verk átján samtímalistamanna sem vísa í líkamann og líkamleika á ýmsa vegu. 
Leiðarljós sýningarinnar er maðurinn sem líkamleg vera sem upplifir, bregst við og á samskipti við annað fólk, náttúru og borgarumhverfi sem líkami. Titill sýningarinnar er fenginn að láni úr fyrirbærafræði, sem er grein innan heimspeki þar sem gerð er tilraun til að  endurheimta einlæg tengsl mannsins við heiminn. Líkami okkar leikur veigamikið hlutverk í upplifun okkar á heiminum og er hugtakið líkamleiki notað til að minna á að við upplifum og bregðumst við heiminum sem hugsandi og skynjandi líkamar, sem endurspeglast í verkum sýningarinnar. Líkaminn birtist í verkum sem miðill listamannsins í gjörningum, í líkamlegri upplifun og viðbrögðum okkar við heiminum, holdlegri náttúru og samruna manns og líkama.
Sýningin mun standa til 15. apríl og verður haldin fjölbreytt viðburðadagskrá tengd henni. Listamenn sýningarinnar eru Bára Kristinsdóttir, Claire Paugam, Eirún Sigurðardóttir, Elín Hansdóttir, Eva Ísleifsdóttir, Guðrún Benónýsdóttir, Haraldur Jónsson, Hrafnhildur Arnardóttir / Shoplifter, Hrafnkell Sigurðsson, Hreinn Friðfinnsson, Katrín Elvarsdóttir, Klængur Gunnarsson, Margrét Bjarnadóttir, Roni Horn, Sigurður Guðmundsson, Steina, Una Margrét Árnadóttir og Örn Alexander Ámundason.