Leiðsögn með Æsu Sigurjónsdóttur

Æsa Sigurjónsdóttir listfræðingur og sýningarstjóri verður með leiðsögn um sýningu Elínar Hansdóttur og Úlfs Hanssonar, Ad Infinitum, og sýningu Santiagos Mostyn, 08-18 (Past Perfect). Sýningarnar tvær eru hluti af dagskrá Ljósmyndarhátíðar Íslands 2022. 
Æsa Sigurjónsdóttir er listfræðingur og dósent við Háskóla Íslands. Hún hefur skrifað um sjónmenningu, ljósmyndir og samtímalist á innlendum og erlendum vettvangi og birt fjölda fræðigreina um þau efni. Hún er einn höfunda bókarinnar Fegurðin er ekki skraut. Íslensk samtímaljósmyndun sem kom út 2020, en henni ritstýrði Æsa ásamt Sigrúnu Ölbu Sigurðardóttur. Þá er hún einn höfunda ritsins A World History of Women Photographers sem er væntanleg hjá Thames & Hudson.
Æsa hefur lengi starfað á vettvangi sýningarstjórnunar og unnið með ýmsum listamönnum í tengslum við textaskrif og sýningargerð. Þar má nefna Halldór Ásgeirsson, Harald Jónsson, Katrínu Elvarsdóttur, Kristleif Björnsson, Ólöfu Nordal, Ósk Vilhjámsdóttur, Sigurð Árna Sigurðsson, Sigurð Guðjónsson, Pétur Thomsen og Spessa. Hún vann að sýningunni Vísitasíur í Listasafninu á Akureyri með listamönnunum Bryndísi Snæbjörnsdóttur og Mark Wilson (2021). Hún er ritstjóri og meðhöfundur bókarinnar Óræð Lönd. Samtöl í sameiginlegum víddum, sem fjallar um rannsóknarlist þeirra Bryndísar og Marks, en bókin er gefin út af Gerðarsafni með stuðningi Rannís.