Á sýningunni Afrit eru verk sjö samtímalistamanna sem afbyggja hugmyndir okkar um ljósmyndir sem glugga að raunveruleikanum. Sýningin er í senn könnun á óljósu eðli ljósmyndarinnar og leikur með möguleika miðilsins þar sem látið er reyna á þolmörk hans.
Ljósmyndir kunna að virðast hlutlaus birtingarmynd veruleikans en í raun sýna þær okkur aðeins yfirborð hluta. Þær eru afritun af útliti afmarkaðs veruleika en því má ekki gleyma að ljósmyndin sjálf er þrívíður hlutur. Í stað þess að líta á ljósmynd sem glugga að veruleikanum er nær lagi að líta á hana sem umbreytingu úr einum hlut í annan.
Verkin á sýningunni minna á að ljósmynd er afritun og endurtekning á því sem hún birtir. Afritunin sjálf verður að umfjöllunarefni listamannanna með vísun í það að ljósmyndir eru augnablik sem hafa verið fryst, afrituð og varðveitt. Afritunin birtist í yfirfærslu af landslagsljósmynd þar sem ljósmyndina sjálfa er hvergi að sjá. Hún birtist í varðveislu á útliti náttúrulegra fyrirbrigða þar sem mennskur og jarðfræðilegur tími mætast. Hún birtist einnig í endurtekningu þar sem hver mynd er örlítið breytt afritun af hinni fyrri. Frosin augnablik fara að líða á ný með endurtekningu hvers ramma.
Listamenn:
Anna Júlía Friðbjörnsdóttir
Bjarki Bragason
Claudia Hausfeld
Hallgerður Hallgrímsdóttir
Katrín Elvarsdóttir
Pétur Thomsen
Þórdís Jóhannesdóttir
Sýningarstjóri:
Brynja Sveinsdóttir.
Sýningin Afrit er hluti af Ljósmyndahátíð Íslands 2020.
Mynd: Hallgerður Hallgrímsdóttir, A Few Thoughts on Photography Vol. II, 2019.
