Birgittuþing – málstofa um rithöfundinn Birgittu H. Halldórsdóttur og verk hennar.
Öll velkomin, skráning á eyrun.osk@kopavogur.is
Þegar talað er og skrifað um uppgang íslensku glæpasögunnar er iðulega miðað við árið 1997 – árið sem þau Arnaldur Indriðason og Stella Blómkvist gáfu út sínar fyrstu bækur. Það er í sjálfu sér ekki óeðlilegt, enda höfðu þá aðeins komið út 34 íslenskar glæpasögur eftir 13 höfunda. 21 þeirra var eftir karla – en 13 eftir Birgittu Halldórsdóttur, sem var hvergi nærri hætt þegar þarna var komið sögu.
Og nú er er komin út hennar 21. glæpasaga, rúmum tuttugu árum eftir að sú síðasta kom út. Hið íslenska glæpafélag fagnar þessari endurkomu Birgittu með málþingi um hana og verk hennar.
Birgitta Halldórsdóttir – frumkvöðull kvenna á sviði glæpasagna
Birgitta Halldórsdóttir er einn afkastamesti – og vinsælasti – glæpasagnahöfundur landsins og var lengi vel eina konan í þeirra hópi. Sérstaða hennar sem rithöfundar var og er mikill, því hún blandar saman ástar- og glæpasagnahefðinni sem dansa á mörkum þess að vera æsispennandi ástarsögur og rómantískar glæpasögur.
Elva Rún Pétursdóttir bókmenntafræðingur flytur hér fyrirlestur sem hún vann upp úr BA-ritgerð sinni um Birgittu og hennar verk, þar sem hún skoðar meðal annars hvernig nokkrar af sögum hennar falla inn í formúlu klassískra og harðsoðinna glæpasagna.
„Það fellur betur í kramið hjá lesandanum”
Í viðtali við dagblaðið Dag í desember 1998 segist Björn Eiríksson útgefandi hjá Skjaldborg svartsýnn á framtíð íslensku glæpasögunnar. Hann segir ágætlega hafa gengið að selja bækur Birgittu Halldórsdóttur, en aðra íslenska sakamálahöfunda hafi honum ekki tekist að selja að ráði. Skýringarnar eru tvær, að hans mati: Birgitta hafi náð að skapa sér nafn „á meðan slíkar bækur voru enn í tísku” og svo sé hún líka „útlenskari“ en kollegar hennar – skrifi eins og erlendur höfundur. Og það, segir hann, „fellur betur í kramið hjá lesandanum.“ En hversu „útlensk“ var Birgitta í sínum skrifum?
Ævar Örn Jósepsson, foringi Hins íslenska glæpafélags, reynir að komast til botns í því.
Undir óskasólu
Fyrsta nýja bók Birgittu í tuttugu ár, Undir óskasólu, er komin út hjá Storytel. Þetta er sjálfstætt framhald sögunnar Dætur regnbogans, sem kom út 1992. Birgitta les upp úr bókinni og segir frá tilurð hennar og forsögu.
Hlé – kaffiveitingar
Miðaldra maðurinn og dularfullu konurnar
Miðaldra bóksafnari rekst á krumpaðan, upplitaðan fregnmiða: Forlagaflækja, Týnda brúðurin, Afbrot og ástir, Ást og dagar, Kona vitarvarðarins, Sigrún og Inga. Sjö bækur, fjórar konur: Aðalheiður Karlsdóttir, Ísól Karlsdóttir, Guðbjörg Hermannsdóttir og Birgitta H. Halldórsdóttir. Hvað er í gangi?! Hvaðan komu þessar konur?
Árni Matthíasson, tónlistar- og bókmenntagagnrýnandi, lestrarhestur og sérlegur áhugamaður um allt sem er öðruvísi, kannaði málið.
Hver er Birgitta?
Ævar Örn ræðir við rithöfundinn og bóndann Birgittu H. Halldórsdóttur um verk hennar og rithöfundarferil.
