Komið með í Lautarferð!
Boðið er upp á á ljúfa tóna í grennd við frábær útivistasvæði Kópavogs. Fyrri viðburðurinn verður í Vinabæjarlundi í Kópavogsdal (neðan við Digraneskirkju) kl 14, þann 13. júlí næstkomandi.
Hugmyndin er sú að fólk mæti, njóti lifandi tónlistar, með teppi og snarl í góðra vina hópi. Viðburðirnir bera heitið „Lautarferðin“ og bjóða upp á dýrmæta blöndu af lifandi tónlist, lautarstemningu og útivist. Tónlistarkonan MGT hitar upp með léttri raftónlist og Marína Ósk mun svo spila fyrir okkur á þessum tónleikum.
Tónlist Marínu Óskar dansar á mörkum kántrí-, folk-, jazz- og popptónlistar og leikur hún sér frjálst og flæðandi að blanda saman tónlistarstílum. Lagasmíðar hennar, sem eru bæði á ensku og íslensku, eru lagrænar og grípandi. Marína hlaut Íslensku tónlistarverðlaunin á dögunum fyrir Jazzsöng ársins 2024 en árið 2022 hlaut hún þau einnig, þá fyrir Jazztónsmíðar ársins. Á tónleikunum mun hún leika lög úr eigin lagasmíðabálki, m.a. af nýútkominni þriðju plötu sinni, Oh, Little Heart, og mega áheyrendur búast við mjúkri og hjartavermandi tónleikaupplifun.
Viðburðurinn er styrktur af Menningar- og mannlífsnefnd Kópavogs.
