Árlegt bókaspjall Bókasafns Kópavogs fer fram á aðalsafni undir stjórn Guðrúnar Sóleyjar Gestsdóttur.
Rithöfundarnir Dagur Hjartarson, Elísabet Jökulsdóttir og Snæbjörn Arngrímsson lesa úr nýjustu verkum sínum og taka þátt í líflegum umræðum.
Elísabet Jökulsdóttir hefur sent frá sér bókina Saknaðarilmur. Elísabet hlaut Íslensku bókmenntaverðlaunin árið 2020 fyrir bókina Aprílsólarkuldi sem einnig var tilnefnd til Fjöruverðlaunanna árið 2021. Nýjasta bók Elísabetar fær frábæra dóma og lætur engan ósnortinn.
Dagur Hjartarson gaf frá sér bókina Ljósagangur í byrjun október og er hún þriðja skáldsaga höfundar. Ljósagangur er í senn ljóðræn spennusaga, ástarsaga og vísindaskáldsaga. Fyrsta skáldsaga Dags, Síðasta ástarjátningin, var tilnefnd til Bókmenntaverðlauna Evrópusambandsins árið 2017. Dagur hefur einnig unnið til verðlauna fyrir ljóðabækur sínar og hlaut Ljóðstaf Jóns úr Vör árið 2016.
Snæbjörn Arngrímsson gefur nú út sína fyrstu skáldsögu fyrir fullorðna, Eitt satt orð, sem hefur vakið mikla athygli nýverið. Snæbjörn hefur starfað sem bókaútgefandi, þýðandi og barnabókahöfundur síðastliðin misseri og hlaut Íslensku barnabókaverðlaunin árið 2019 fyrir bókina Rannsóknin á leyndardómum Eyðihússins.
Léttar veitingar, kertaljós og huggulegheit.
Aðgangur ókeypis og öll velkomin á meðan húsrúm leyfir.
