Verið öll velkomin á erindið „Endurheimt líkamans“ með Chanel Björk sunnudaginn 19. október kl. 14:00 í Gerðarsafni. Erindið er haldið í tengslum við sýninguna Corpus.
Líkaminn hefur í gegnum tíðina verið hlaðinn ýmsum merkingum sem segja til um félagslega stöðu og virði hvers og eins. Á tímum evrópskrar heimsvaldastefnu og nýlenduhyggju (e. imperialism and colonisation) voru líkamar þeirra sem taldir voru óvinir evrópskra-valda markaðir neikvæðri merkingu. Það lagði grunninn að kynþáttahyggju, sem enn í dag hefur áhrif á það hvernig við lítum á og metum mismunandi líkama.
Í þessu erindi mun Chanel Björk skoða nýlenduarfleifðina sem liggur að baki staðalímyndum um líkama svartra og annarra jaðarsettra hópa í nútímanum, og fjalla um leiðir til að endurheimta líkama sem sagan hefur hlaðið neikvæðri merkingu. Hvernig lærir maður að meta líkama sinn í samfélagi sem segir að húðlitur, líkamsgerð, hár og andlitsfall passi ekki inn í ráðandi hugmyndir um fegurð? Í samfélagi þar sem hvítleiki og evrópsk einkenni eru talin æskilegust, fallegust og „eðlilegust“, stendur margt fólk frammi fyrir spurningunni: Hvernig get ég elskað og tekið pláss með líkama sem fellur ekki að þeirri ímynd?
Erindið fjallar um líkamsímynd, arfleifð nýlenduhyggju og leiðir til að endurheimta eigin líkama með stolti og virðingu.
–
Chanel Björk er dagskrárgerðarkona og sérfræðingur í jafnréttismálum. Hún er umsjónarmaður Mannflórunnar, fræðsluvettvangur um fjölmenningu og fordóma í íslensku samfélagi, og lauk nýverið meistaranám í Eftirlendufræðum við SOAS háskólann í London.
