Gísli Pálsson, mannfræðingur og prófessor emeritus við HÍ, fjallar um geirfuglinn sem táknmynd aldauða í hádegiserindi í Gerðarsafni.
Erindið er haldið í tengslum við yfirlitssýningu á verkum Bryndísar Snæbjörnsdóttur og Mark Wilson, „Óræð lönd: Samtöl í sameiginlegum víddum“ þar sem samspil manna, dýra, náttúru og umhvefis eru í brennidepli.
Aðgangur ókeypis og öll velkomin meðan húsrúm leyfir.
Geirfuglinn hefur löngum verið sveipaður dulúð. Þessi ófleygi, svipmikli fugl sem lifði við Íslandsstrendur er ekki lengur til nema í frásögnum og á myndum; fáeinir uppstoppaðir hamir eru varðveittir, blásin egg og líffæri í krukkum. Fuglinn hefur orðið tákn tegunda í útrýmingarhættu og nú þegar við blasir fjöldaútrýming tegunda á saga hans meira erindi við okkur en nokkru sinni.
Gísli Pálsson mannfræðingur er meðal annars kunnur fyrir rit sín um umhverfismál og norðurslóðir, sem og verðlaunabókina „Hans Jónatan: maðurinn sem stal sjálfum sér.“ Fyrir réttu ári kom út bókin „Fuglinn sem gat ekki flogið“ en þar rekur Gísli forvitnilega sögu síðustu geirfuglanna og Geirfuglabókanna, segir frá því hvernig þær rak á fjörur hans og hvað þær hafa að geyma – og fjallar um aldauða. Bókin var tilnefnd til Íslensku bókmenntaverðlaunanna. Menning á miðvikudögum er styrkt af Lista- og menningarráði Kópavogs.
ENGLISH
Gísli Pálsson, anthropologist, writer and professor emeritus at the University of Iceland, talks about the great auk as a symbol of extinction in a talk at Gerðarsafn Contemporary Art Museum. The talk is in Icelandic.
Free entrance.
