Haltu mér – slepptu mér er fyrirlestraröð fyrir foreldra ungmenna á aldrinum 12-18 ára um ýmis málefni sem tengjast þroska og uppeldi unglinga með áherslu á áskoranir í nútímasamfélagi.
Alvarleg ofbeldisbrot þar sem ungt fólk kemur við sögu virðast hafa aukist í íslensku samfélagi á síðustu árum. Þetta á bæði við um ofbeldi sem ungmenni verða fyrir og það sem þau fremja. Þó að þessi þróun birtist skýrt í fjölmiðlaumfjöllun undanfarið er mikilvægt að skoða gögnin nánar til að skilja raunverulegt umfang og eðli þessa vanda. Í erindinu verður rýnt í gögn sem varpa ljósi á þróun ofbeldis meðal ungs fólks og greint hverjir helstu áhættuþættirnir eru. Áhersla verður lögð á að skoða hvað virkar í forvörnum, hvaða aðferðir reynast árangurslausar og hafa jafnvel öfug áhrif. Auk þess verður fjallað um hvaða inngrip hafa reynst árangursríkust til að draga úr áhættuhegðun og koma í veg fyrir frekari brot.
Margrét Valdimarsdóttir er dósent í félags- og afbrotafræði við Háskóla Íslands. Hún gegndi áður stöðu dósents í lögreglufræði við Háskólann á Akureyri. Margrét lauk doktorsprófi í afbrotafræði frá CUNY í New York árið 2020. Rannsóknir hennar beinast aðallega að áhættuhegðun ungmenna, löggæslu og langtímaáhrifum refsandi inngripa. Rannsóknir hennar hafa birst í virtum alþjóðlegum tímaritum, þar á meðal Journal of Research in Crime and Delinquency og Politics & Gender. Undanfarin tvö ár hefur Margrét tekið þátt í alþjóðlega rannsóknarverkefninu International Self-Report Delinquency (ISRD4) Study, sem fjallar um afbrot ungmenna.
Önnur erindi í Haltu mér slepptu mér koma inn á málefni á borð við hinseginleikann, svefn og ofbeldi ungmenna.
Ókeypis aðgangur og öll velkomin.
7. janúar 2025, kl. 20:00
Fræðsla um svefn og svefnráð fyrir ungmenni
Erla Björnsdóttir, sálfræðingur og svefnráðgjafi, fjallar um mikilvægi svefns fyrir heilsu, líðan, árangur og frammistöðu ungmenna.
4. febrúar 2025, kl. 20:00
PISA, lesskilningur og lestur ungmenna
Sigríður Ólafsdóttir, dósent við Menntavísindasvið Háskóla Íslands, rýnir í niðurstöður PISA-könnunarinnar í lesskilningi árið 2022. Hún mun fjalla um hæfniþrep PISA og tengja þau við samfélagslega umræðu hér á landi. Þá mun hún fjalla um mál- og læsiseflandi samskipti á heimili og í skóla sem leggja grunn að djúpum lesskilningi, eins og metinn er í lesskilningshluta PISA.
4. mars 2025, kl 20:00
Hinseginleikinn og ungmenni
Edda Sigurðardóttir, fræðslustýra Samtakanna ʻ78, ræðir við foreldra um hvað er að vera hinsegin og útskýrir helstu hugtök og orðnotkun. Hún mun einnig fjalla um stöðu og áskoranir ungs fólks þegar kemur að hinseginleika, hvernig foreldrar geti verið styðjandi og hvaða úrræði standa til boða.
1. apríl 2025, kl. 20:00
Tölvuleikir og tölvuleikjanotkun ungmenna
Kristján Ómar Björnsson og Patrekur Gunnlaugsson, kennarar í grunnskólanum NÚ í Hafnarfirði, ræða um tölvuleiki og tölvuleikjanotkun ungmenna, hvaða leikir eru vinsælir, hvað foreldrar geta gert til að styðja börn sín og sýna áhugamáli þeirra áhuga ásamt því að stuðla að líkamlegu og andlegu heilbrigði og félagslegum tengslum.
