Hörður Ágústsson (1922-2005) var leiðandi innan myndlistar, hönnunar, kennslu og fræðistarfa. Hann hafði mótandi áhrif á þróun geómetrískrar abstraktlistar hérlendis og ekki síður grafískrar hönnunar með umfangsmiklu starfi á sviði bókahönnunar. Hörður var leiðandi rödd innan myndlistarumfjöllunar á 20. öldinni með ritstjórastörfum sínum í Birtingi, fræðistörfum og útgáfustarfi.
HÖRÐUR er endurlitssýning á verkum Harðar Ágústssonar sem opnar í Gerðarsafni 4. febrúar 2026. Á sýningunni verður lögð áhersla á geómetríska myndlist Harðar og hvernig hún tengist hönnun hans og myndlistarhugsun. Hvernig formræn nálgun hans teygir sig á milli listgreina og úr sjónrænni afurð í hugmyndaheim hans og skrif um myndlist.
Sýningarstjórn sýningarinnar er í höndum Brynju Sveinsdóttur og Studio Studio (Arnari Frey Guðmundssyni og Birnu Geirfinnsdóttur) og er sýningin unnin í nánu samstarfi við börn Harðar.
