Verið velkomin á síðdegistónleika í Gerðarsafni næstkomandi föstudag. Leikið verður á hringflautu, hugarfóstur hönnuðanna Brynjars Sigurðarsonar og Veroniku Sedlmair.
Verk Brynjars og Veroniku er hluti af yfirstandandi sýningu í Gerðarsafni Einungis allir, sem er hluti listahátíðarinnar Cycle. Hringflautan samanstendur af fjórum þverflautum sem sveigðar eru að lögun og mynda samsettan hring en innan hans er pláss fyrir áheyranda. Til að tryggja eðlilega hljóðmyndun í flautunum eru munnstykki þeirra einu hlutar hringflautunnar sem ekki eru sveigðir. Hver hreyfing með hljóðfærið hefur áhrif á hina flytjendurna og getur haft áhrif á tónmyndun hvers flytjanda fyrir sig, Stöðugt líkamlegt samtal á sér því stað á milli flytjenda á meðan leikið er á hljóðfærið. Þetta samtal er áheyrendum hulið en birtist í smágerðum dansi flytjendanna og hreyfingu hljóðfærisins. Meira um Hringflautuna hér .
Flytjendur eru:
Berglind María Tómasdóttir,
Björg Brjánsdóttir,
Melkorka Ólafsdóttir
Steinunn Vala Pálsdóttir.
Á efnisskrá eru verk eftir Þuríði Jónsdóttur, Pauline Oliveros og flytjendur.
Aðgangur er ókeypis.
