Ransu, einn af sýningarstjórum Fullt af litlu fólki, leiðir gesti um sýninguna sem stendur yfir í Gerðarsafni. Sýningarverkefnið „Fullt af litlu fólki“ skoðar hið andlega í listum. Titillinn er sóttur í efni fyrirlesturs sem austurríski mannspekingurinn Rudolf Steiner hélt árið 1922 um formmyndun mannseyrans.
Þátttakendur sýningarinnar eiga það sameiginlegt að rannsaka andleg, esóterísk eða mannspekileg gildi og aðlaga þau myndlist, grafískri hönnun, dansi, tónlist og jafnvel fræðum, í von um að svipta burt hulunni á milli þess andlega og efnislega. En auk listaverka á sýningunni er boðið upp á fyrirlestra, námskeið og samræður þar sem leitast er eftir að dýpka tengsl og skilning á sambandi milli hins andlega og efnislega.
Jón B.K. Ransu er myndlistarmaður, menntaður í Hollandi á árunum 1990–1995. Árið 2006 tók hann þátt í International Studio and Curatorial Program í New York og hlaut þá styrk úr sjóði Krasner Pollock Foundation. Ransu starfar einnig sem fræðimaður og er höfundur tveggja bóka um samtímalist. Þá́ var hann meðhöfundur bókarinnar Gerður: Meistari málms og glers þar sem hann fjallar um tengsl Gerðar Helgadóttur við heimsmyndakenningar G.I. Gurdjieffs. Sem sýningarstjóri hefur Ransu m.a. unnið að sýningum fyrir Listasafn Íslands, Listasafn Reykjavíkur og Nýlistasafnið. Hann var einn af sýningarstjórum tvíæringsins Momentum 9: Alienation í Moss í Noregi árið 2017. Ransu er deildarstjóri við listmálaradeild Myndlistaskólans í Reykjavík.
Aðgangur er ókeypis og allir velkomnir.
Mynd: Elsa Dórótea Gísladóttir flytur gjörninginn Gíg á opnun sýningarinnar Fullt af litlu fólki.
