Andri Snær Magnason verður fyrsti gestur vetrarins í Leslyndi. Andri Snær er fæddur árið 1973 og fyrsta bók hans Ljóðasmygl og skáldarán kom út árið 1995.
Andri Snær hefur skrifað ljóð, leikrit, smásögur, skáldverk og heimildarrit.
Verk hans hafa komið út á meira en 40 tungumálum og heimildarmyndir hans hafa verið sýndar á helstu kvikmyndahátíðum heims, sú nýjasta byggð á bók hans Um Tímann og vatnið var sýnd á Sundance 2026.
Fjölbreyttur ferill hlýtur að benda til þess að hann hafi orðið fyrir fjölbreytilegum áhrifum og lesi fjölbreyttar bækur þannig að gestir eiga gott í vændum.
Leslyndi hverfist um yndislestur og uppáhaldsbækur. Þjóðþekktir bókaunnendur stíga á stokk og deila eftirlætishöfundum og bókakveikjum með gestum. Ævintýri og ástarsögur, dagbækur og draumráðningar, sígildar sögur og samtímaverk; orðið er frjálst.
Viðburðaröðin hefur notið mikilla vinsælda og skapað sér fastan sess undanfarin misseri, þegar fólk flykkist að til að sjá hina ýmsu rithöfunda deila með okkur sínum uppáhaldsbókum.
Aðgangur er ókeypis og öll eru hjartanlega velkomin á meðan húsrúm leyfir.
Viðburðurinn er styrktur af menningar- og mannlífsnefnd Kópavogsbæjar.
