Miðvikudaginn 13. júní kl. 12:15 verður boðin hádegisleiðsögn um sýninguna Gerður: Yfirlit með Kristínu Dagmar Jóhannesdóttur, safnstjóra sem einnig sýningarstýrði sýningunni í samstarfi við Brynju Sveinsdóttur.
Á sýningunni er sjónum beint að fjölbreyttum listferli og ævi Gerðar, allt frá námsárum hennar til síðustu æviára, en hún lést fyrir aldur fram aðeins 47 ára gömul. Gerður tók fyrst íslenskra kvenna forystu í höggmyndalist og var brautryðjandi í þrívíðri abstraktlist og glerlist hérlendis. Sýningin var sett upp í tilefni afmælisárs Gerðar Helgadóttur en hún hefði orðið níræð á árinu (1928–1975).
Erindið er liður í dagskránni Menning á miðvikudögum á vegum Menningarhúsanna í Kópavogi. Aðgangur er ókeypis og allir velkomnir.
