Myndir ársins 2014

Mynd: Sigtryggur Ari Jóhannsson
28.02.2015 – 04.04.2015
Árleg sýning Blaðaljósmyndarafélags Íslands á bestu myndum ársins 2014 var opnuð laugardaginn 28. febrúar klukkan 15.00 í Gerðarsafni í Kópavogi.  Á sýningunni voru sýndar 116 myndir sem valdar voru af dómnefnd úr 905 myndum 24. blaðaljósmyndara.
Veitt voru verðlaun í níu flokkum, þ.e. fyrir Mynd ársins og fyrir bestu fréttamyndina, umhverfismyndina, portrett myndina, íþróttamyndina, daglegt líf, tímaritamynd, myndröð ársins og myndskeið ársins. Bók með bestu blaðaljósmyndum ársins 2014 kom út við þetta tækifæri og var kynnt á sýningunni.
Við sama tækifæri voru veitt blaðamannaverðlaun í fjórum flokkum, þ.e. Blaðamannaverðlaun ársins, Rannsóknarblaðamennska ársins, Viðtal ársins og Umfjöllun ársins. Dómnefnd hefur tilnefnt þrjá í hverjum flokki.