Ókeypis námskeið með Edward de Boer og Ruth Bellinkx þar sem hvatinn að baki andlegra verka Rudolf Steiners, Hilmu Af Klint og Joseph Beuys verður skoðaður í gegnum æfingar, tilraunir, fræðslu og samtöl. Hver listamaður er með einstaka nálgun og sjónarhorn á andlega þætti tilverunnar, hvernig þeir tengjast og hafa áhrif á veraldlega – og félagslega þætti hennar. Á seinni hluta námskeiðsins verða sjónarhorn og sýn á mannkynið og samfélagið skoðuð út frá kenningum Klint, Steiner og Beuys með spurningum á borð við: ,,Hvernig getur myndlist verið verkfæri til að skapa opin samfélög framtíðarinnar?‘‘
Viðburðurinn stendur frá kl. 10:00 – 17:00 og skráning fer fram á gerdarsafn@kopavogur.is
Ruth Bellinkx lærði listasögu í Gent og Amsterdam. Hún hóf feril sinn sem stjórnandi í alþjóðlegu listagalleríi í Amsterdam. Eftir mörg ár í starfi gerðist hún sjálfstætt starfandi ráðgjafi fyrir einstaklinga og pör. Nú um stundir starfar Ruth sem kennari fyrir ráðgjafa og þerapista. Hún tengir saman vinnu sína við nútímalist og ráðgjöf. Hún telur að list (sér í lagi nútímalist) opni ný skynjunarsvið og tengingar.
Edward de Boer er stjórnunarráðgjafi, þjálfari og rithöfundur. Hann er með BA-gráðu í hollenskri tungu og bókmenntum frá Hogeschool van Amsterdam og lauk fornámi í guðfræði og heimspeki við þýskan einkaskóla. Sem þjálfari, fyrirlesari og ráðgjafi hefur hann starfað í Benelux-löndunum, Þýskalandi, Englandi, Sviss og Ítalíu. Hann hefur líka unnið sem verkefnastjóri í Króatíu, Georgíu, Rúmeníu og Slóveníu. Hann hefur hlýjan húmor og smitandi áhuga á viðfangsefnum sínum og er árangursmiðaður í starfi.
Mynd: Leifur Wilberg. Dansarinn Martje Brandsma flytur gjörning á opnun sýningarinnar Fullt af litlu fólki á Gerðarsafni, 2019.
