Skiptir náttúran einhverju máli fyrir sálarheill okkar? Já, vissulega, og í erindinu verður fjallað um það, sem og hvernig hún getur stuðlað að betri heilsu og vellíðan. Einnig verður horft til grænna og blárra svæða, og gluggað í áhrif veðurs á upplifun okkar og líðan.
Páll Jakob Líndal er með doktorspróf í umhverfissálfræði frá Háskólanum í Sydney. Hann er sérfræðingur í mati á sálfræðilegum áhrifum umhverfis á heilsu og vellíðan, hvort um er að ræða náttúru eða byggt umhverfi. Páll hefur áralanga reynslu af skipulagsmálum og verkefnum er snúa að verndun byggingararfsins, s.s. uppmælingum og gerð húsakannana, auk þess að vinna að sálfræðilegum rannsóknum.
Páll á og rekur TGJ – hönnun-ráðgjöf-rannsóknir og nýsköpunar- og ráðgjafarfyrirtækið ENVALYS. Þá kennir Páll umhverfissálfræði við Háskóla Íslands og Landbúnaðarháskólann á Hvanneyri auk þess að vera fyrirlesari og pistlahöfundur í Samfélaginu á Rás 1
Menning á miðvikudögum er styrkt af Lista- og menningarráði Kópavogsbæjar. Viðburðir eru haldnir á víxl á Bókasafni Kópavogs, Gerðarsafni, Náttúrufræðistofu Kópavogs og Salnum þar sem boðið er upp á fjölbreytt erindi, listamannaleiðsagnir og tónleika. Ókeypis er á alla viðburði í viðburðaröðinni.
