Samspil teikningar og hreyfingar er í brennidepli, þar sem leikið er með í spuna hvernig ólíkir miðlar, danslist og myndlist, hafa áhrif hvor á annan.
Byrjað er á stuttri sýningu þar sem listakonurnar sýna nemendum sitt samstarf. Að sýningu lokinni er unnið með þátttakendum í vinnusmiðju þar sem þau prófa sig áfram með að teikna hreyfingu og hreyfa sig eftir teikningum.
Unnið er í pörum, þar sem þátttakendur teikna munstur, orð, teikningar og vinna með í hreyfingu. Í vinnusmiðjunni leikum við okkur með hugtök sem áhrifagjafa í teikningu og hreyfingu: form, liti, tilfinningar og tempó og virkjum þannig ímyndunaraflið og sköpunarkraftinn.
Aðgangur er ókeypis og öll hjartanlega velkomin.
Fjölskyldustundir á laugardögum eru styrktar af lista- og menningarráði Kópavogsbæjar.
Rán Flygenring er af norskum og íslenskum uppruna, fæddist í Osló og ólst upp í Reykjavík. Rán starfar sem sjálfstætt starfandi teiknari og myndhöfundur. Rán hefur gefið út hátt í annan tug bóka á Íslandi og í Þýskalandi, bæði ein og í samstarfi við aðra höfunda og bækur hennar og samstarfsfólks verið þýddar á fjölda tungumála. Rán hefur hlotið ýmis verðlaun og viðurkenningar fyrir verk sín.
Katrín starfar sem danshöfundur, dansari, rannsakandi og kennari. Í verkum sínum fæst hún meðal annars við mýktina, hið hljóðláta, síbreytilegt flæði, vinnu dansarans og líkamann sem safn hreyfinga. Hún hefur hlotið fjölda viðurkenninga fyrir verk sín og sýnt víðsvegar um Ísland og í Evrópu. Ásamt því að þróa eigin verk starfar hún með sviðslistahópnum Marble Crowd og teiknaranum Rán Flygenring.
