Guja Dögg Hauksdóttir gefur innsýn í valin verk Högnu Sigurðardóttur arkitekts (1929-2017) með áherslu á íslensk verk hennar. Fyrirlesturinn byggir á rannsóknum Guju Daggar á ævistarfi Högnu, þar sem leitast er við að lesa verk hennar undir formerkjum ljóðræns módernisma með tilvísun í skáldverk, sköpuð í þrívítt form og áþreifanlegt efni í stað orða á blaði.
Guja Dögg Hauksdóttir útskrifaðist í arkitektúr frá Aarhus School of Architecture árið 1994. Frá útskrift hefur hún unnið með byggingingarlist á breiðum grundvelli rannsókna, þróunarstarfs og miðlunar í margvíslegu formi.
Rannsóknarverkefni Guju Daggar á ævistarfi Högnu Sigurðardóttur arkitekts hófst vorið 2009. Í fyrstu sem undirbúningur fyrir sýningu á verkum Högnu á Kjarvalsstöðum – með áherslu á verk hennar á Íslandi – og síðan sem viðamikil rannsókn á verkum hennar – hér og í Frakklandi sem hún er nú að vinna til útgáfu bókar.
Lista- og menningarráð Kópavogsbæjar styrkir Menningu á miðvikudögum.
