„Hvissssss! Beygðu þig niður, þarna þýtur hún hjá!“
Á skutlusmiðju ÞYKJÓ setjum við okkur í spor flugvélahönnuða og verkfræðinga. Hvaða form flýgur lengst? Hvað gefur skutlunni byr undir báða vængi? Viltu setja glugga á þína skutlu?
Smiðjan fer fram á Lindasafni. Aðgangur er ókeypis og öll hjartanlega velkomin.
ÞYKJÓ er þverfaglegt teymi hönnuða sem vinna fyrir börn og fjölskyldur þeirra á sviði upplifunarhönnunar, innsetninga og vöruhönnunar. Hönnunarstarf þeirra miðar að því að örva ímyndunarafl og sköpunarkraft barna í samstarfi við mennta- og menningarstofnanir.
Á meðal nýlegra verkefna er innsetningin Hljóðhimnar í Hörpu, húsgagnalínurnar Kyrrðarrými og Hreiður og þátttökuverkefnið Gullplatan: Sendum tónlist út í geim! ÞYKJÓ hlaut Hönnunarverðlaunin árið 2024 og var einnig tilnefnt til sömu verðlauna 2021 og 2022. Eins hlaut teymið tilnefningu til alþjóðlegu YAM verðlaunanna.
Viðburðurinn er liður í Fjölskyldustund á laugardögum sem styrktar eru af menningar- og mannlífsnefnd Kópavogsbæjar.
