Velkomin í fjöltyngda listsmiðju sem leiðir saman menningarheima í gegnum arabísk leturtákn!
Laugardaginn 31. ágúst frá kl. 13-15 býður Hamraborg Festival upp á fjöltyngda fjölskyldusmiðju þar arabísk leturtákn verða innblástur fyrir listræna sköpun undir leiðsögn Líbönsku listakonunnar Yöru Zein með aðstoð Ingunnar Fjólu Ingþórsdóttur. Tungumál smiðjunnar eru íslenska, enska og arabíska.
Í smiðjunni fá þátttakendur tækifæri til að kanna arabíska skrautskrift og læra grunnatriði í arabískri leturgerð í skemmtilegu og skapandi umhverfi. Allur efniviður verður á staðnum; stenslar, pappír og marglitir pennar, sem þátttakendur nota til að skapa sín eigin listaverk. Smiðjan er opin gestum á öllum aldri, en hvorki er krafist kunnáttu í arabísku né bakgrunns í listum. Hægt er að koma við á þeim tíma sem hentar hverjum og einum og dvelja eins lengi og hentar.
Yara Zein (f. 1995) er líbönsk listakona búsett á Íslandi. Hún er með BA gráðu í myndlist og arkitektúr frá Académie Libanaise des Beaux Arts í Beirút og MFA í myndlist frá Nottingham Trent háskólanum á Englandi. Verk Yöru bera vott um bakgrunn hennar og reynslu af því að alast upp í Líbanon í kjölfar borgarastyrjaldar.
Smiðjan er liður í viðburðaröðinni Together sem er skipulögð af Menningarhúsunum í Kópavogi í samstarfi við GETU – hjálparsamtök. Markmiðið er að stuðla að gagnkvæmum skilningi menningarheima og að vera samskipta- og sköpunarvettvangur fyrir fólk úr ólíkum áttum.
Aðgangur ókeypis og öll hjartanlega velkomin.
