Á næsta ári verða liðin 20 ár frá því ljóðasamkeppnin Ljóðstafur Jóns úr Vör var fyrst haldin. Af því tilefni verður hátíðin með sérstöku tyllidagasniði.
Samkeppni í minningu mikilvægs brautryðjanda
Fyrsti Ljóðstafurinn var veittur árið 2002, á afmælisdegi skáldsins Jóns úr Vör þann 21.janúar en Ljóðstafurinn hefur verið veittur á þeim degi allar götur síðan; keppnin er haldin til minningar um skáldið sem lést 4. mars árið 2000. Jón var brautryðjandi í íslenskri ljóðagerð eins og fjölmargar ljóðabækur hans bera vott um en að auki var hann mikilvægur liðsmaður menningarmála í Kópavogi, var bóksali, ritstjóri og síðast en ekki síst hvatamaður að stofnun Bókasafns Kópavogs og gegndi stöðu bæjarbókavarðar um árabil.
Sautján skáld hafa hneppt Ljóðstaf Jóns úr Vör frá því hann var fyrst veittur, níu konur og átta karlmenn en Anton Helgi Jónsson er eitt skálda til að hafa hlotið Ljóðstafinn í tvígang. Fyrstur til að hreppa hnossið var Hjörtur Pálsson en núverandi handhafi Ljóðstafsins er Þórdís Helgadóttir sem hlaut verðlaunin fyrir ljóð sitt Fasaskipti en í umsögn sinni sagði dómnefnd, skipuð Ástu Fanneyju Sigurðardóttur, Eiríki Guðmundssyni og Kristínu Svövu Tómasdóttur, ljóðið úthugsað, leikandi áreynslulaust og iða af göldrum góðrar ljóðlistar.
FASASKIPTI
Ég elska börnin mín og börnin sem börnin mín
Elska og börnin sem elska börnin mín.
Þau keyra kuldaskó í gegnum ísinn þegar
Tjörnina hefur lagt. Þau elska að beita afli.
Brjóta flísar úr ísingunni og halda þeim upp að
Andlitinu. Ég sé þau út um gluggann, saltsleikt
Auga hússins. Þau sjá mig gegnum tært gler.
Ljósgul skíma og svo dimmir. Þannig er tíminn
Skorinn í sneiðar, hvítar og svartar, skiptingin
Ekki bróðurleg frekar en á öðrum gæðum.
Frostið herðir á aðgreiningunni milli heima
Og breytir lygum í sannindi. Gerir göngubrú úr
Svokölluðu yfirborði vatnsins. Ef falskir botnar fela
Eitur eða fjársjóði, hvað felur þá falskt yfirborð?
Börnin en ekki ég treysta gljúpri himnunni
Yfir handanheiminum þar sem andardrátturinn
Rennur í öfuga átt. Enda er stutt síðan þau komu
Í gegn, önduðu hringöndun meðan þau drukku,
Fljótandi fæði úr sykurbrjósti. Þau bíta í rendurnar
Bryðja glerbrjóstsykur, stolt af styrk sínum.
Í barnatennur vantar taugarnar fyrir tannkul.
Það blómstrar ætiþistill í eldhúsglugganum.
Enginn elskar veturinn eins og börnin mín.
Silfurskreyttur göngustafur gengur á milli skálda
Það er Lista- og menningarráð Kópavogsbæjar sem stendur fyrir Ljóðstafnum og er öllum skáldum frjálst að senda inn ljóð sem skal vera frumort á íslensku og má ekki hafa birst áður. Ljóðin eru send inn undir dulnefni og eru því metin alfarið á forsendum ljóðlistarinnar án þess að bakgrunnur skáldsins hafi nokkur áhrif á mat dómnefndar.
Höfundur sigurljóðsins hlýtur að launum peningaverðlaun, verðlaunagrip og silfurskreyttan göngustaf Jóns til varðveislu í eitt ár; á stafinn er festur skjöldur með nafni skáldsins og ártali.
Fyrir tíu árum var svo bryddað upp á þeirri nýbreytni að efna einnig til ljóðasamkeppni á meðal grunnskólabarna í Kópavogi en verðlaun í þeirri keppni eru einnig veitt við sömu athöfn. Á síðasta ári hlaut Kári Rafnar Eyjólfsson úr Álfhólsskóla fyrstu verðlaun fyrir magnað ljóð sitt Englabróðir.
Skilafrestur í keppnina nálgast
331 ljóð bárust í keppnina á síðasta ári en frestur til að skila inn ljóði í Ljóðstaf Jóns úr Vör er að þessu sinni til og með 5. nóvember. Handhafi Ljóðstafsins verður svo verðlaunaður við hátíðlega athöfn í Salnum á afmælisdegi skáldsins, 21.janúar og verður sú athöfn lokahnykkur á Dögum ljóðsins sem fagnað verður í Kópavogi í tilefni tvítugsafmælis þessarar merkilegu ljóðasamkeppni.
Eftirfarandi hafa hlotið Ljóðstaf Jóns úr Vör
2021
Þórdís Helgadóttir: Fasaskipti
2020
Björk Þorgrímsdóttir: Augasteinn2019
Brynjólfur Þorsteinsson: Gormánuður2018
Sindri Freysson: Kínversk stúlka les uppi á jökli2017
Ásta Fanney Sigurðardóttir: Silkileið nr. 172016
Dagur Hjartarson: Haustlægð2015
Ljóðstafur ekki veittur2014
Anton Helgi Jónsson: Horfurnar um miðja vikuna2013
Magnús Sigurðsson: Tunglsljós2012
Hallfríður J. Ragnheiðardóttir: Triptych2011
Steinunn Helgadóttir: Kaf2010
Gerður Kristný: Strandir2009
Anton Helgi Jónsson: Einsöngur án undirleiks2008
Jónína Leósdóttir: Miðbæjarmynd2007
Guðrún Hannesdóttir: Offors2006
Óskar Árni Óskarsson: Í bláu myrkri2005
Linda Vilhjálmsdóttir: Niður2004
Hjörtur Marteinsson: Hvorki hér né …2003
Ljóðstafur ekki veittur2002
Hjörtur Pálsson: Nótt frá Svignaskarði
