Gerðarsafn og Náttúrufræðistofa Kópavogs hlutu nýverið Öndvegisstyrk frá Safnasjóði upp á 10 milljónir króna. Styrkurinn er til þriggja ára fyrir verkefnið Náttúra í gegnum linsu myndlistar sem er þriggja ára fræðsluverkefni fyrir börn á leik- og grunnskólaaldri þar sem tengsl myndlistar og náttúru eru könnuð. Í öndvegisverkefninu tvinnast saman sérfræðiþekking innan myndlistar í Gerðarsafni og í náttúruvísindum í Náttúrufræðistofu Kópavogs og byggir á farsælu þverfaglegu samstarfi safnanna tveggja í fræðslu undanfarin ár. Verkefnið spannar fimm skólaannir og á hverri önn er ákveðið þema og sértækt rannsóknarefni tekið fyrir með hverjum aldurshópi út frá aðalnámskrá grunnskólanna og námskrá leikskóla. Náttúra í gegnum linsu myndlistar er tilraunaverkefni í þverfaglegri safnafræðslu fyrir fyrstu skólastigin þar sem tekið er stórt skref í átt að auka þátttöku safnanna í menntun barna. Börnin fá tækifæri til að uppgötva og rannsaka á eigin forsendum þar sem þau eru bæði vísindamennirnir og listamennirnir.
Safnasjóður er í umsjón Safnaráðs í umboði menningar- og viðskiptaráðuneytisins. Lilja Alfreðsdóttir ráðherra afhenti Brynju Sveinsdóttur forstöðumanni Gerðarsafns og Finni Ingimarssyni forstöðumanni Náttúrufræðistofu Kópavogs viðurkenningarskjal vegna styrksins.
