Skerpla er annar mánuður í sumri samkvæmt gamla norræna tímatalinu og stendur frá 22. maí til 20. júní. Á þessum tíma hafa flestir fuglar hafið varp. Hrossagaukurinn er einn af þeim fuglum sem er bæði algengur og áberandi. Hann helgar sér landsvæði (óðal) og innan þess er hreiðrið. Óðalið ver hrossagaukurinn með einkennandi fluglagi og hneggi umhverfis svæðið.
Hrossagaukur er útbreiddur fugl og finnst allt í kring um norðurpól og einnig í Suður-Ameríku og sunnanverðri Afríku. Hneggið heyrist þegar fuglinn er á flugi, tekur dýfu og glennir út stélið, en við það beinist loftstraumur að ystu stélfjöðrunum sem titra og mynda hið sérkennilega hljóð.
Spádómar: Hver sá er heyrir í fyrsta sinn hnegg hrossagauksins skal athuga úr hvaða átt það kemur en hún segir til um auðnu manns á komandi ári. Sé hneggið úr austri ertu auðs gaukur, úr suðri sæls gaukur, úr norðri náms gaukur en úr vestri vesæls gaukur. Hneggi hann uppi ertu unaðs gaukur en niðri nágaukur. Þjóðsögur Jóns Árnasonar.
04
maí
Bókasafn Kópavogs
11:30
