Hvaða íslensku glæpasögu halda Kópavogsbúar mest upp á? Bókasafn Kópavogs hefur í samstarfi við bæjarlistamanninn Lilju Sigurðardóttur hrundið af stað kosningu til að komast að því.
Sérfræðingar bókasafnsins tóku saman lista yfir hundrað glæpasögur sem gefnar hafa verið út á Íslandi síðastliðin þrjátíu ár. Skilyrði var að höfundar þeirra hefðu samið að minnsta kosti þrjár bækur og bækurnar hefðu verið skrifaðar upphaflega á íslensku. Úr þessum hundrað bóka lista kjósa Kópavogsbúar allt að tíu glæpasögur en niðurstöður úr kosningunni verða kynnar með pompi og pragt 22. maí næstkomandi.
Kosningin hefst 23. apríl, á degi bókarinnar, og stendur yfir til 14. maí. Kjörgengi hafa þau sem eru með lögheimili í Kópavogsbæ og eru með rafræn skilríki.
