SJÓMANNADAGUR Í SALNUM – SIGGI BJÖRNS LÍTUR UM ÖXL
Flateyringurinn og heimshornaflakkarinn Siggi Björns heldur tónleika í Salnum í Kópavogi á sjálfan sjómannadaginn, 7. júní.
Þegar Siggi var að alast upp fyrir vestan skiptist árið í tvennt: fyrir og eftir jól – og fyrir og eftir sjómannadag. Spakur maður sagði eitt sinn um Vestfirðinga: „Þeir eru ekki Íslendingar fyrr en þeir eru komnir erlendis.“ Siggi tók því bókstaflega.
Á þessum tónleikum lítur hann um öxl – í tali og tónum – og segir sjóarasögur af verbúðaflakki, sjómennsku og lífsins slarki. Sögur sem eru missannar, en allar með nógu miklu vestfirðusku kryddi til að harðfisklyktin sitji í Salnum í nokkra daga á eftir.
Síðustu fjörutíu ár hefur Siggi verið á ferðinni með gítarinn og spilað í yfir tuttugu löndum – allt frá dimmustu knæpum til virtra
tónleikasala. Hann hefur búið erlendis í yfir þrjátíu og fimm ár, fyrst í Danmörku og nú í Þýskalandi, og spilar ennþá um 150–200 tónleika á ári með eigið efni og vel valdar ábreiður.
Á sjómannadaginn flytur hann úrval laga úr eigin smiðju – lög sem hafa mótast af sjó, söknuði, húmor og heimsflakki.
Í hljómsveit kvöldsins verður úrvalslið tónlistarfólks:
- Pálmi Sigurhjartarson á píanó,
- Sigurgeir Sigmundsson á gítara,
- Jón Kjartan Ingólfsson á bassa,
- Franziska Günther á gítar og söng,
- og sonur hans, Magnús Björnsson, á trommur.
Auk þess má búast við góðum gestum á sviðið, meðal annars félögum úr Hljómsveitin Æfingu – svo eitthvað sé nefnt.
Eitt er víst: Þetta verður skemmtilegt ferðalag um tíma og tíð – með sögum, söng og salti í lofti. Sjómannadagurinn fær hljóm, hjarta og kannski örlitla harðfisklykt.
