Duology er yfirskrift tónleika hörpuleikaranna Katie Buckley og Elísabetar Waage. Nafnið er dregið af heiti tónsmíðar Lars Graugaard sem samin var fyrir dúóið. Tvíleikur er líklega besta þýðingin á Duology og á þessum tónleikum birtist harpan í tvívídd. Leikin verður tónlist eftir Bach og Kolbein Bjarnason og farið verður frá rómantík Viktoríutímabilsins til tónmáls 20. og 21. aldar.
Prelúdía Bachs er úr fiðlusónötu nr.6 og hefur hún verið útsett fyrir ýmis hljóðfæri; hér fyrir 2 hörpur.
Osian Ellis heimsótti Ísland fyrir nokkrum áratugum, hélt hörputónleika í Austurbæjarbíói og lék einleik með Sinfóníuhljómsveit Íslands. Hann hélt einnig tölu í Tónlistarskólanum í Reykjavík um samstarf sitt við Benjamin Britten. Eins og Ellis var John Thomas frá Wales. Hann hlaut nafnbótina Hörpuleikari Viktoríu drottningar. Tónsmíð hans byggist á velskum þjóðlögum.
Lars Graugaard samdi septettinn States and Shapes fyrir 5 klarinettuleikara og 2 hörpuleikara. Verkið var frumflutt af Caput-hópnum árið 2019. Strax í kjölfarið ákvað Lars að nota efni úr þeirri tónsmíð til að skrifa hörpudúó fryir Katie og Elísabetu og úr varð Duology. Þetta er frumflutningur verksins.
Carlos Salzedo fæddist í Frakklandi en flutti ungur til Bandaríkjanna. Hann var hörpuleikari, píanóleikari, tónskáld og stjórnandi. Mörg fyrstu skref hörpunnar í átt að nútímatónlist komu frá honum. Tónsmíðar hans fyrir hörpu eru ákaflega vel skrifaðar fyrir hljóðfærið og oft mjög smellnar.
Kolbeinn Bjarnason samdi Þrjár etýður og eftirmáli (Three etudes and an epilogue) fyrir Elísabetu Waage og Katie Buckley árið 2019. Í fjórum köflum skoðar hann mismunandi hljómmöguleika hörpunnar. Eftirmálinn er innblásinn af ljóðlínu eftir Snorra Hjartarson: „ … lyftu úr húmum hyl / hljóms þíns björtu rós.“ Tónleikarnir enda á óvenjulegu verki Lars Graugaard sem nefnist Touchdown. Oft er leikið fjórhent á slaghörpu en það sama gildir ekki um konserthörpur. Hér leikur Lars sér með þessa hugmynd og útkoman er spaugileg.
Efnisskrá
J.S.Bach (1685-1750): Prelúdía úr fiðlusónötu nr. 6
O.Ellis (1928-2021): Diversions for two harps
J.Thomas (1826-1913): Suite
L.Graugaard (1957): Duology
HLÉ
C.Salzedo (1885-1961): Chanson dans la nuit, Tango og Rumba
Kolbeinn Bjarnason (1958): Three etudes and an epilogue
L.Graugaard (1957): Touchdown
