Í tilefni af evrópsku nýtnivikunni verður blásið til fataskiptimarkaðar á aðalsafni Bókasafns Kópavogs dagana 21. nóvember til 3. desember. Komdu með föt, skó og töskur á 1. hæð aðalsafns og gríptu með þér eitthvað spennandi í staðinn.
Þema nýtnivikunnar í ár er sjálfbærni, föt og annar textíll undir slagorðinu „Sóun er ekki lengur í tísku!“ Markmið átaksins er að hvetja fólk til að draga úr óþarfa neyslu, nýta hluti betur og draga þannig úr myndun úrgangs. Textíliðnaðurinn er einn sá umfangsmesti í heimi og honum fylgir gríðarleg efnanotkun, ferskvatnsmengun og losun gróðurhúsalofttegunda svo það skiptir miklu máli að draga úr sóun textíls.
Umhverfisstofnun heldur úti verkefninu Saman gegn sóun. Á Facebook, Instagram og heimasíðu verkefnisins má finna upplýsingar um umhverfis- og samfélagsleg áhrif textíliðnaðarins og lausnir við þeim vanda sem iðnaðurinn stendur frammi fyrir.
