Verið velkomin í stúdíóið!
Gerðarsafn býður gestum á samtal Berglindar Jónu Hlynsdóttur myndlistarkonu og Þóris Steingrímssonar leikara, lögreglumanns og stofnanda Hamraborgarrásarinnar, þar sem rætt verður um Hamraborgina og um sögu, tilurð og stefnu þessarar metnaðarfullu sjónvarpsstöðvar sem margir Kópavogsbúar muna eflaust eftir.
Samtal Berglindar og Þóris mun eiga sér stað inní innsetningu Berglindar sem er endurgerð af stúdíói Hamraborgarrásarinnar og verður sent út á Facebook-síðu safnsins.
Á tíunda áratugnum var starfrækt staðbundin sjónvarpsstöð í fjölbýlishúsinu Hamraborginni, sem var einskonar lýðræðilegur vettvangur íbúanna til skoðanaskipta og umræðu um málefni hverfisins. Á rásinni voru haldnir húsfundir, sýndar bíómyndir og skilaboð send út um ýmiss konar hegðunar- og umgengnisreglur til allra þeirra sem vildu „vinna að framgangi framfara og farsældar“ í Hamraborginni.
Rásin er viðfangsefni Berglindar Jónu Hlynsdóttur á sýningunni Skýjaborg í Gerðarsafni, þar sem hún hefur stillt upp innsetningu af myndveri Hamraborgarrásarinnar, skjáskotum og gömlum klippum úr útsendingum stöðvarinnar.
Þórir Steingrímsson leikari og lögreglumaður var stofnmaður rásarinnar og formaður Hamraborgarráðsins á árunum 1993-1999, og kann eflaust ótal sögur af þessari metnaðarfullu starfsemi.
Verið velkomin á þennan sögulega viðburð á safninu þann 2. maí klukkan 13:00.
Sóttvarnir: Gestir skrá sig við komu á safnið og verður sóttvarna gætt í hvítvetna, grímur og handspritt í boði. Viðburðinum verður einnig streymt á Facebook-síðu safnsins.