Á Safnanótt gefst gestum kostur á að dvelja í innsetningunni MOLTU og kynnast henni frá ýmsum hliðum.
Frá 20:00 – 21:00 og 22:00 – 23:00 mun Rósa Ómarsdóttir, danshöfundur, vera á staðnum og bjóða upp á leiðsögn um innsetninguna fyrir gesti og gangandi.
Frá 21:00 – 22;00 munu nemendur af samtímadansbraut LHÍ flytja dans inni í MOLTU sem er innblásinn af innsetningunni.
Aðgangur er ókeypis og öll velkomin.
MOLTA er alltumlykjandi og þverfagleg innsetning og lifandi sýning. Listamaðurinn Rósa Ómarsdóttir býr til vistkerfi þar sem náttúrulegir ferlar umbreyta rýminu. Innsetningin bráðnar, lekur, brotnar niður, vex, blandast saman og gufar upp. Molta er myndlíking. Molta er í senn jarðvegur niðurbrots og frjósemi, þar sem úrelt og úrsérgengin fyrirbæri brotna niður og ný spretta upp. Í MOLTU skoðar Rósa hvernig vistkerfið er óstöðugt og tekur sífelldum breytingum. Hún kannar mörk manns, umhverfis og tækni þar sem allt hefur áhrif hvort á annað. Menn sameinast sveppum, plastögnum og rafeindum. Hvað sprettur upp úr moltunni?
