Kraftverk

Kraftverk er spunadanshópur sem samanstendur af listamönnunum Önnu Kolfinnu Kuran, Elínu Signýju Weywadt Ragnarsdóttur, Elísabetu Birtu Sveinsdóttur, Gígju Jónsdóttur og Guðrúnu Selmu Sigurjónsdóttur sem útskrifuðust allar af samtímadansbraut Listaháskóla Íslands árið 2013. Hópurinn hefur unnið að spunadanssýningum síðan 2015 og flytur nýtt staðbundið verk á Hamraborg Festival 2023. Verkið verður flutt í undirgöngum þar sem dansararnir fimm takast á við þær áskoranir og möguleika sem rýmið býður upp á. Sú óvissa og berskjöldun sem felst í spunaaðferðinni er lykillinn að hugmyndafræði Kraftverkshópsins. Töfrarnir felast í því ófyrirsjáanlega og í þeim aðstæðum skapast rými fyrir einlægni, húmor, átök og samstöðu. Dansararnir klæðast einkennisbúningum sínum, kraftgöllum, sem þeir afklæðast í verkinu og afhjúpa um leið mismunandi undirlög sem skapa nýja gagnvirkni og spennu í framvindu verksins. Með verkinu leitast hópurinn eftir að skapa tengipunkt milli sín, áhorfenda og rýmisins.