Sunnudaginn 7. október kl. 15:00-16:00 fer fram listamannaspjall með Steinunni Önnudóttur.
Á sýningunni SKÚLPTÚR / SKÚLPTÚR býður safnið samtímalistamönnum að ganga inn í sýningu Gerðar Helgadóttur undir hatti sýningarraðarinnar og með því er gerð tilraun til að draga fram skúlptúrinn í samtímanum, ekki einungis sem mikilvægum hluta listasögunnar heldur einnig sem lifandi sjónrænu tungumáli samtímalistarinnar. Listamenn sýningarinnar í ár eru Áslaug Íris Katrín Friðjónsdóttir, Jóhanna Kristbjörg Sigurðardóttir, Steinunn Önnudóttir, Styrmir Örn Guðmundsson og Gerður Helgadóttir.
Athuganir Steinunnar Önnudóttur eru á bilinu milli ásetnings og tilviljana sem er ríkjandi í verkum hennar. Á sama tíma og hún tekur efnið föstum tökum skilur hún eftir rými til að leyfa því að þróast í óvæntar áttir. Steinunn fæst fyrst og fremst við málverk og skúlptúra sem renna gjarnan saman og skilin eru óljós.
Steinunn (f. 1984) útskrifaðist með BA í myndlist frá Gerrit Rietveld Academie í Amsterdam árið 2011 og lauk einnig BA í grafískri hönnun frá sama skóla árið 2009. Hún býr og starfar í Reykjavík þar sem hún rekur sýningarrýmið Harbinger en hefur einnig fengist við útgáfu bóka og bókverka.
Aðgangur á safnið gildir á viðburðinn.
08
sep
Salurinn
15:00
