Ljósið kemur er yfirskrift jólatónleika sem hinn margverðlaunaði tónlistarhópur Nordic Affect heldur samstarfi við Rás 1 á aðventunni.
Nordic Affect hópurinn er þekktur fyrir frjó efnistök en í upphafi tónleikanna er gestum boðið að slást í för með Höllu kerlingu sem, með ljóstýru í hönd, býður hlustendum inn í torfkofann sinn. Þar með hefst ferðalag í tónum þar sem þjóðlagatónlist frá Íslandi og Hjaltlandseyjum fléttast saman við verk eftir Anthony Holborne, Henry Purcell, William Byrd ofl. Öllu er þessu ofið saman við ný rafhljóðverk eftir Höllu Steinunni Stefánsdóttur þar sem m.a. bregður fyrir hljóðupptökum Magnúsar Bergssonar á norðurljósum.
Flytjendur á tónleikunum eru Halla Steinunn Stefánsdóttir fiðluleikari, Hanna Loftsdóttir gömbuleikari, Sigurður Halldórsson sellóleikari og Guðrún Óskarsdóttir semballeikari.
Sérstakir gestir eru Ian Wilson blokkflautuleikari og söngvarinn Eyjólfur Eyjólfsson sem einnig leikur á hvannarflautu og langspil.
Kynnir: Guðni Tómasson.
Tónleikarnir eru liður í samstarfi Ríkisútvarpsins og EBU, Sambands evrópskra útvarpsstöðva, og verður þeim útvarpað vítt og breitt um Evrópu, sunnudaginn 17. desember, á jólatónleikadegi EBU.
Aðgangur er ókeypis og öllum heimill meðan húsrúm leyfir.
