Skapandi sumarstörf í Kópavogi halda lokahátíð í Salnum Kópavogi, fimmtudaginn 24. júlí 2025. Dagskráin stendur frá kl. 17-20 og býðst gestum að sjá afrakstur tveggja mánaða vinnu hjá listafólki sumarsins. Þetta er tuttugasta starfsár Skapandi sumarstarfa í Kópavogi og því ber að fagna!
Starfið veitir ungu listafólki á aldrinum 18-26 ára tækifæri til að vinna að eigin listsköpun og hefur það reynst mikilvægur stökkpallur fyrir margt af efnilegasta listafólki landsins. Í sumar voru starfrækt 13 spennandi og ólík verkefni og stóðu að baki þeim 28 listamenn úr mismunandi miðlum og höfðu þau aðsetur í Molanum, miðstöð ungs fólks.
Húsið opnar 17:00 þegar forsalurinn opnar og verður þar hægt að skoða myndlist og ritverk en svo byrjar dagskrá í salnum sjálfum kl. 17:30.
Meðal verkefna í ár eru söngleikur, stuttmynd, hugleiðsla, vegglist, handrit að þáttum, myndlist og smásögur.
Verið hjartanlega velkomin á lokahátíðina! Ókeypis inn og opið fyrir allan aldur.
