Þegar skammdegið er smám saman að hopa og birtan læðist aftur inn í daginn, býður Hljómsveitin Eva til hlýlegra hádegistónleika í Salnum. Eva flytur kósí tónlist í notalegu umhverfi, tónlist sem er mjúk og einlæg.
Hljómsveitina Evu skipa Vala Höskuldsdóttir og Sigríður Eir Sophoniasardóttir. Þær eru þekktar fyrir angurværa harmoníu, grípandi textasmíði og flæðandi, einlæga og oft húmoríska framkomu. Þær eru í senn hljómsveit og performance hópur og sýna um þessar mundir verkið Kosmískt Skítamix á fjölum Tjarnarbíós.
Þetta er stund til að staldra við í miðri viku, setjast niður, hlusta og leyfa sér að vera í núinu.
Tónleikarnir eru hluti af viðburðaröðinni Menning á miðvikudögum.
