Föstudaginn 25/08 hefst listahátíðin Hamraborg Festival í þriðja sinn. Á laugardaginn 26/08 verður gamla góða Kópavogs-pönkið í aðalhlutverki. Klukkan 18 leiðir Dr. Gunni PÖNKGÖNGU frá Bókasafni Kópavogs.
Farið verður um sements-frumskóg Hamraborgar og sagðar pönksögur og að sjálfssögðu endað í hinni alræmdu Skiptistöð, sem opnuð verður í tilefni dagsins. Strax að göngu lokinni hefjast pönktónleikar í Catalínu með Fræbbblunum, Sóðaskap, Dr. Gunna, Boob Sweat Gang og Afterparty Angel.
Ókeypis inn og ókeypis í gönguna. Borðleggjandi dæmi.
Dr. Gunni (Gunnar Lárus Hjálmarsson) er fæddur í Kópavogi árið 1965 og byrjaði snemma að gutla í tónlist eftir að hann gerðist Bítlaaðdándi um miðjan 8. áratuginn. Ákveðin kúvending varð þegar hann heyrði í Fræbbblnum í Kópavogsbíói 1979. Hann kom fyrst fram með hljómsveit (Dordinglar) á sama stað 1980. Síðan þá hefur hann komið víða við, spilað, sungið, samið og fjallað um tónlist.
