Sviðsmyndir er nýtt ljóslistaverk eftir Eygló Harðardóttur, gert sérstaklega fyrir Vetrarhátíð í Kópavogi 2024. Verkið, sem er í næmu samtali við form Kópavogskirkju og glerlistaverk Gerðar Helgadóttur, verður sýnt á austurhlið Kópavogskirkju, föstudagskvöldið 2. febrúar og laugardagskvöldið 3. febrúar, frá 18:30 – 24:00 bæði kvöldin.
____________
Verkið Sviðsmyndir er vídeóverk sem leggst eins og gegnsæ himna á Kópavogskirkju. Það er byggt upp af fimm sviðsmyndum sem voru lýstar upp og kvikmyndaðar. Sviðsmyndirnar eru: Málverk, Tveir glerskúlptúrar, Lagskipt glerverk, Bókverk og Teikningar á lituðu gleri.
Sviðmyndirnar byggja á samhverfum og lagskiptum formum kirkjunnar, skynjuðum skala og steindum kirkjugluggum Gerðar Helgadóttur sem birtast sem hreyfing ljóss og lita inni í byggingunni sjálfri.
Verkið Sviðsmyndir er í grunninn unnið á handvirkan hátt, efniviðurinn er ljós, hreyfing, litað gler og pappír. Öll stafræn eftirvinnsla og klipping er trú upptökunum. Að því leyti er verkið mjög handvirkt (analogue) og hefur skýrskotun til marglaga birtingarmynda ljóss og efnis og hreyfinga handanna.
Tökumaður og aðstoð við lýsingu: Sigurður Unnar Birgisson
_____________
Eygló Harðardóttir er fædd í Reykjavík 1964. Á ferlinum hefur hún haldið fjölda sýninga og hlaut hún Íslensku myndlistarverðlaunin 2019 fyrir einkasýninguna „Annað rými” sem haldin var í Nýlistasafninu 2018. Eygló vinnur gjarnan tví- og þrívíða abstraktskúlptúra, bókverk og verk í almenningsrými. Sköpunarferlið einkennist af rannsóknum og könnun á aðstæðum og efni, þar sem möguleikar og takmarkanir eru kortlagðar og auðkenni þess rannsökuð. Eftir standa verk sem eru afsprengi ferlis þar sem efnið hefur ráðið för. Hún hefur einnig unnið í samstarfi við tónskáld og í ýmsa miðla. Verk hennar eru varðveitt í Listasafni Íslands, Listasafni Reykjavíkur, Nýlistasafninu, Ríkisútvarpinu, WSW NY, Kultuurikauppila í Finnlandi og The Metropolitan Museum NY.
Eygló hélt nýverið stóra einkasýningu í Ásmundasal og var einn tíu listamanna sem sýndi verk á sýningunni Skúlptur/Skúlptúr sem lauk 7. janúar síðastliðið.
Hefð hefur skapast fyrir því að fá listamann til að gera nýtt verk sem varpað er á Kópavogskirkju á Vetrarhátíð. Þóranna Björnsdóttir gerði nýtt verk fyrir kirkjuna árið 2023 og Sirra Sigrún Sigurðardóttir árið 2022.
Lista – og menningarráð Kópavogsbæjar styrkir Vetrarhátíð í Kópavogi.
