Gagnvirk og lifandi vísindasmiðja fyrir forvitin börn á öllum aldri. Syngjandi skál, teikniþjarkar, spennandi tilraunir, óvæntar uppgötvanir og margt fleira má rannsaka og undrast yfir í Vísindasmiðju Háskóla Íslands.
Á sýningunni Brot úr ævi jarðar, nýrri og veglegri grunnsýningu Náttúrufræðistofu má svo fá innsýn í sögu plánetunnar okkar, þróun lífsins og samspil dýra og plantna við umhverfið og hvert annað.
Öll hjartanlega velkomin á meðan húsrúm leyfir og aðgangur er ókeypis.
**********
Um Vísindasmiðju Háskóla Íslands.
Markmið Vísindasmiðjunnar er að efla áhuga ungmenna á vísindum með gagnvirkum og lifandi hætti, styðja við kennslu á sviði náttúru- og raunvísinda og miðla vísindalegri þekkingu til samfélagsins.
Vísindasmiðja HÍ tekur á móti skólahópum og birtist auk þess víða um land og borg sem farandsmiðja. Vísindasmiðjan hefur undanfarin ár komið reglulega í Kópavoginn og miðlað undrum vísindanna í fjölsóttum og fjörugum fjölskyldustundum.
visindasmidjan.hi.is
**********
Fjölskyldustundir á laugardögum eru styrktar af lista- og menningarráði Kópavogsbæjar.
