Vatnslitatilraunir á ljósmyndapappír
Verið velkomin í fjölskyldustund laugardaginn 29. febrúar kl. 13-15 í Gerðarsafni. Marta María Jónsdóttir og Brynhildur Kristinsdóttir, myndlistarmenn og nemendur í listkennsludeild LHÍ leiða fjölskyldustundina þar sem unnið verður á óhefðbundin hátt með liti, vatn, salt og pappír.
Í smiðjunni verða gerðar tilraunir með vatnsliti, salt og ljósmyndapappír og rannsakað hvernig hægt er að búa til ólíkar áferðir sem minna jafnvel á kristalla og ísjaka. Einnig verður unnið með viðarbúta og búið til vatnslitað þrívítt verk. Að auki býðst gestum smiðjunnar að mála á gömul póstkort og gera þau að sínum eigin verkum.
Smiðjan er hluti af viðburðadagskrá sýningarinnar Afrit, sem nú stendur í Gerðarsafni og er hluti af Ljósmyndahátíð Íslands 2020.
Fjölskyldustundir á laugardögum eru í boði Menningarhúsanna í Kópavogi sem eru Bókasafn Kópavogs, Gerðarsafn, Náttúrufræðistofa, Salurinn og Héraðsskjalasafn.
Smiðjan er öllum opin og er þátttaka gestum að kostnaðarlausu!
Marta María Jónsdóttir er myndlistarmaður og kennari, en hún hefur einnig numið hreyfimyndagerð og starfað við hreyfimyndahönnun. Í verkum sínum kannar Marta mörkin á milli teikningar og málverks, flæði litarins og óvæntar niðurstöður. Hún hefur sýnt víða og tekið þátt í fjölda samsýninga. Marta starfar sem stundarkennari við Myndlistaskólann í Reykjavík.
Brynhildur Kristinsdóttir er myndlistarmaður og kennari. Auk þess að starfa við eigin myndsköpun hefur Brynhildur kennt myndlist og smíðar og átt í samstarfi við ýmsa listamenn, gert leikmyndir og búninga fyrir gjörninga og dans. Brynhildur hefur haldið einkasýningar og tekið þátt í fjölmörgum samsýningum.
27
apr
Gerðarsafn
