Margæsir og hjólað í vinnuna

Vorboðar eru margskonar og það er afar persónubundið hvað fólki finnst marka sumarkomuna. Er það lóan, krían, margæsin eða hið árlega heilsuátak „Hjólað i vinnuna“ ???
Þessa dagana gefst afar gott tækifæri til að sjá margæsir í návígi meðfram strandlengju Skerjafjarðar, en brátt verða þær horfnar til varpstöðva sinna í N-Kanada. Svo vel vill til að meðfram nær allri strandlengju Kópavogs eru greiðir göngu- og hjólastígar með fjölda bekkja og útskota þar sem hægt er að taka pásu og fylgjast með þessum sérkennilegu gæsum, sem eiginlega minna stundum meira á endur – eða bara eitthvað allt annað.
Nú er jafnframt hafið átakið „Hjólað í vinnuna“ og því viðbúið að umferðin á þessum sömu stígum aukist nokkuð frá því sem verið hefur. Því er rétt að draga aðeins úr ferðinni og njóta þess sem umhverfi stíganna hefur upp á að bjóða, því þótt áfangastaðurinn sé mikilvægur má ekki gleyma að njóta ferðalagsins.