Jólakötturinn og bókasafnið

Í tilefni af upphafi jólamánaðarins færði Gréta Björg, deildarstjóri barnastarfs, öllum leikskólum Kópavogsbæjar góða gjöf.
Venjan er að leikskólarnir komi í heimsókn á jólakattarviðburð á Bókasafni Kópavogs og á Náttúrufræðistofu í desember en þar sem þörf er á að passa vel upp á alla í samfélaginu sökum Covid var ákveðið að jólakötturinn myndi færa krökkunum góða sögu í stað þess að koma og fræðast um jólaköttinn á sjálfu safninu. Mikil gleði var fólgin í að taka rúntinn með bók og bréf um vandræði jólakattarins á hvern leikskóla og var ekki annað hægt að sjá en að mikil ánægja hafi verið með framtakið. Er bókin aðventusaga eftir Sigrúnu Eldjárn sem kom út á þessu ári og hægt að lesa einn stuttan kafla á dag um Jóa og Lóu fram að jólum. Þökkum við kærlega fyrir góðar móttökur, kæra leikskólafólk. Hlökkum til að taka á móti ykkur á nýju ári!