Páll Einarsson hefur látið af störfum sem tæknimaður Salarins eftir farsæl ár í starfi. Við þökkum honum kærlega fyrir vel unnin störf og vináttuna. Í hans stað hefur Birgir Jón Birgisson, eða Biggi, verið ráðinn.
Biggi er með bachelorpróf í upptökutækni frá School of Audio Engineeringí London og diplómapróf í umhverfis- og auðlindafræði frá Háskóla Íslands. Hann hefur áralanga reynslu sem tæknimaður og sem hljóðmaður. Hann starfaði sem tæknimaður hjá RÚV við útsetningar, upptökur og framleiðslu, dagskrárgerð, fréttavinnslu og fleira.
Birgir hefur unnið sem hljóðmaður á tónleikum, mest fyrir tónlistarmanninn Mugison, en einnig fyrir Sigur Rós, Pétur Ben, Amiinu ofl.
Birgir átti og rak hljóðverið Sundlaugina í Mosfellsbæ þar sem hann starfaði sem hljóðmaður og við gerð hljómplatna, kvikmynda, tónleika, sjónvarps- og útvarpsútsendinga. Sá hann jafnframt um hönnun á upptökukerfum bæði stafrænum og hliðrænum, um viðhaldsvinnu og bilanagreiningar.
Samkvæmt Didda, píanóstilli og umsjónarmanni flygla Salarins, er hann Biggi: „…bara alger snillingur, og mjög góður strákur.“ Það eru meðmæli í lagi.
Við bjóðum Bigga velkominn til starfa.
