Vigdís Másdóttir hefur verið ráðin kynningar- og markaðsstjóri menningarmála í Kópavogi en hún var valin úr hópi 120 umsækjenda um starfið. Vigdís tekur við starfi Írisar Maríu Stefánsdóttur sem nú rær á önnur mið eftir farsæl ár í starfi.
Vigdís starfaði síðast sem kynningarstjóri Listaháskóla Íslands þar sem hún stýrði öllu kynningar-, markaðs-, og viðburðastarfi skólans og fór fyrir teymi verkefnastjóra þvert á skólann og deilda innan hans.
Vigdís hefur áralanga reynslu í viðburðahaldi auk þess sem hún hefur unnið að fjölbreyttum markaðstengdum verkefnum. Vigdís er með meistaragráðu í listkennslu og leikarapróf frá Listaháskóla Íslands.
Vigdís hefur nú þegar hafið störf hjá Kópavogsbæ og bjóðum við hana hjartanlega velkomna til starfa.
