Sigríður Beinteinsdóttir, betur þekkt sem Sigga Beinteins, er bæjarlistamaður Kópavogs 2025. Tilnefningin var formlega tilkynnt við hátíðlega athöfn í Bókasafni Kópavogs í dag af Elísabetu Sveinsdóttur, formanni menningar- og mannlífsnefndar, en nefndin velur bæjarlistamann.
Sigga Beinteins er ein af ástsælustu og virtustu söngkonum landsins. Hún hafði sungið í bílskúrshljómsveit hér í Kópavogi allt frá árinu 1980 þegar HLH flokkurinn fékk hana til liðs við sig í laginu Vertu ekki að plata mig sem skaut Siggu upp á stjörnuhimininn. Hún starfaði lengst af með hljómsveitinni Stjórnin á níunda áratugnum og hefur síðan þá verið áberandi í íslensku tónlistarlífi, bæði sem sólólistamaður og í samstarfi við aðra. Sigga hefur þrisvar sinnum keppt fyrir Íslands hönd í Eurovision og hefur gefið út gríðarlegan fjölda vinsælla laga sem notið hafa mikillar hylli almennings. Auk ferilsins sem poppsöngkona hefur Sigga lagt sitt af mörkum til barnaefnis á Íslandi, meðal annars með útgáfu á tónlistarverkefninu Söngvaborg, þar sem lög og sögur fyrir börn fá að njóta sín á lifandi og skapandi hátt.
Tilnefningin er viðurkenning fyrir það ómetanlega framlag sem Sigga hefur fært landsmönnum og íslensku tónlistarsenunni í gegnum árin. Hún hefur verið búsett í Kópavogi um árabil, en með tilnefningunni gefst bæjarfélaginu tækifæri til að heiðra og þakka einstökum listamanni og styrkja tengslin við hana.
Í hlutverki sínu sem bæjarlistamaður hyggst Sigga Beinteins standa fyrir sérstakri söngskemmtun fyrir börn í efstu deildum leikskóla Kópavogs. Þá eru einnig fyrirhugaðir tónleikar í Salnum síðar á árinu, þar sem hún lítur yfir ferilinn og miðlar reynslu og sögum úr langri og litríki vegferð í tónlistinni.
Kópavogsbær fagnar því innilega að fá Siggu Beinteins í hóp bæjarlistamanna og hlakkar til samstarfsins á komandi ári.
Á myndinni eru Soffía Karlsdóttir forstöðumaður menningarmála, Ásdís Kristjánsdóttir bæjarstjóri, Sigríður Beinteinsdóttir og Elísabet Sveinsdóttir formaður menningar- og mannlífsnefndar.
